NITORI AMOSUN: SENETO OBADARA LOUN KO DIJE DUPO MO *N LAWON EEYAN KAN BA SO PE ERU LO N BA A

Seneto Obadara

L’Ọjọruu, Wẹsidee, ọsẹ yii ni Gomina Ibikunle Amosun sọ nita gbangba nibi ipade awọn ọmọ ẹgbẹ APC tipinlẹ Ogun pe ki gbogbo awọn to n tẹnu bọlẹ kaakiri lọ gbẹnu dakẹ nitori oun ti jade bayii lati dije fun ipo sẹnetọ fun aarin gbun-gbun ipinle Ogun (Ogun Central).

Ibikunle Amosun

Bo si ti sọ ọ tan lawọn ọmọlẹyin ẹ ti wọn wa nibẹ ti n fo soke, bi ẹni ti ko gbọ iru ẹ ri pe Amosun tun fẹ lo sile igbimo asofin agba leekan si i, ti wọn si n ki ara wọn ku oriire. Ṣugbọn ko too digba naa ni Sẹnẹto Ọbadara ti fi erongba ẹ han lati jade dupo naa lẹẹkeji labẹ asia ẹgbẹ oṣelu APC.

Afi bo ṣe di aarọ ọjọ Ẹti, Fraide ti Sẹnetọ Ọbadara gbe atẹjade kan sita pe niwọngba ti Gomina Amosun ti sọ ipinnu ẹ pe oun fẹ dije dupo, oun fipo naa silẹ fun un. Awọn eeyan ko kọkọ gbagbọ tẹlẹ pe Ọbadara to ti n leri pe oun yoo tun se e leekan si i lọdun 2019, ni ko tiẹ janpata to fi fipo naa silẹ bayii.

Awọn ọmọ ẹgbẹ oṣelu naa ti wọn gbọ bi ọkunrin naa ṣe sọ pe oun ko dupo mọ, ti so pe ẹru Amosun lo n ba a, ati pe ko fẹ fowo ẹ jona ni. Wọn ni bi ko ba juwọ silẹ, ti Amosun ko dije, o see se ki won ma fun un lanfaani lati dije si i, nitori ko si ninu awon to n tele gomina ohun tẹlẹ.

Bo tilẹ jẹ pe ọkunrin naa sa ipa fawọn iṣẹ akanṣe to ṣe lawọn aarin gbun-gbun ipinlẹ Ogun, eyi ti wọn ni ẹni to wa nibẹ tele ko ṣe ida ogun ẹ. Won ni, kani Ọbadara ni igboya ni, ko yẹ ko tete gbe igbesẹ to gbe yẹn. Idi niyi ti wọn fi ni ẹru Amosun lo n ba a, ati pe ko fe na owo to ti ri ko jo danu, nitori o see se ki kinni ohun ma bo si i lowo. 

Awọn kan tun sọ pe ohun to mu ki Ọbadara tete gbe igbeṣẹ naa ni pe ko fe ba Gomina Amosun ma fa ipo ohun, eyi to see se ko sakoba fawon nnkan to ni nipinle ohun bii ileese, paapaa redio to da silẹ to pe ni Sweeth FM.